風霜倍滄桑

今天係唐人街食食下飯, 突然有人坐下鄰枱, 第一眼我望佢, 十分面善, 只是真係記唔起係邊度見過佢.

只是看清楚, 心中感到對方有點似黑幫大佬, 我就開始唔敢多望, 有少少驚.

但係呢, 我感到對方都係覺得我面善啦, 最後佢由同佢朋友講煲冬瓜, 轉到同侍應講廣東話, 我都記唔起佢係邊個.

後來大家食完, 各自埋單走人, 我行行下唐人街, 才記起佢係邊個, 已經15年前了, 佢曾經教過我煲冬瓜, 佢太太以前有份攪中文學校, 我就係去佢果度學煲冬瓜.

Killer Prof..... 殺手教授

哈哈哈, 最近國內網上紅完美女大學生, 又來紅爆美女教授.

就係這位叫戴菲菲的美女了

只是呢, 以我係加記求學的經驗呢, 男教授有少少發胖的, 通常會好鍚學生咖, 女教授呢, 通常都會好嚴好惡, 尤其有幾份姿色, 高高瘦瘦果D...... 我真係好怕佢地... 噢.....

唔知道係咪靚女呢, 天生係同靚仔唔多岩傾呢嗄? 又或係有任何原因, 例如..... 曾經被某個靚仔HURT過.

有次, 有個教授曾經來同我講: "JJ, 乜你成日D答題都唔岩咖, 你再係咁, 我係唔會俾你合格喎!"

不過, 我發覺隔離個肥鬼仔答得比我更無厘頭啦, 佢都無交叉零蛋佢喎! 

為何香港不會使用人民幣?

最近有國內學者講, 香港可以嚐試用人仔做法定貨幣.
 
我覺得, 現在仍然十劃未有一撇, 因為香港係國際金融中心, 使用的貨幣一定要自由流通和浮動, 現在上海自由貿易區, 只是讓人仔在這小小幾平方公里內的地方, 來自由兌換, 但不要忘記, 自貿區初時.... 每天數額仍然一定有限制, 一到兌匯率到某水平, 就會封枱唔俾人再玩下去.
 
可能到左若干年後, 人仔可以全面自由流通和匯價自由浮動, 香港才能夠考慮用人仔囉.
 
有人可能會講, 一邊用人仔一邊用港紙, 這個就更麻煩, 風險更大.
 
人民幣強勢左咁多年, 靜靜雞同大定講一事, 就快會輪到美元強勢了, 港元同美元掛勾, 好快港元兌人仔就會升.
 
美國來緊十年裡, 因為頁岩氣開發, 和能源自給自足, 經濟會企穩, 美元會轉強. 雖然我仍然唔相信普遍美國民眾生活會有大幅改善, 但美國富人必會富上加富.... 美元再會企強企硬, 港紙兌人仔會升, 現在香港通漲會得到一定程度上的舒緩.

看看國內法治

近來, 國內發生一件小販在城管幫辦公室內, 刀殺2名城管人員案.

這個讓我記起, 香港60-70年代的小販管理隊, 以我記憶, 當時未發生任何命案, 只有些襲擊案吧.

生命何價? 都唔值得咁去傷人殺人? 國內這單案一定係積怨, 雙方並不是頭一次衝突, 案中人更隨身帶刀. 能夠短時刀殺2人刀傷一人, 相信並不是盛怒之下的突發事情, 刀也可能不是普通刀, 而是有血溝的軍刀, 整件事可能是有些預謀的報復事件.

只是國內小販不擺街, 何以活下去呢? 尤其在一些經濟落後地區, 擺賣可能是維生的唯一方法吧!

我想, 國內有些人並不相信法治, 而國內有些地區的經濟和民生仍未得到好的解決, 這個才是這單案件的終極原因.

我相信, 每一個中央官員都知道, 以上這2個問題, 只是一時三刻解決不了吧! 

打風時, 來追風

天兔襲港那一晚上, 聽聞單單在尖沙咀, 就聚集了數百年青人來追風.....

更有人出埋"香港追風地圖", 詳烈廿多個位處港九新界的追風熱點(https://maps.google.com.hk/maps/ms?hl=zh-TW&ie=UTF8&brcurrent=3,0x3403e2eda332980f:0xf08ab3badbeac97c,0&msa=0&msid=203689062933205004516.0004a462d91e7934ac16c&ll=22.321198,114.115278&spn=0.207193,0.286991&source=embed), 並且分開為交通便利和不便利, 而且, 還說明那熱點的「迎風角」, 以應對天文台發出颱風的風向，又講明一公里外有無任何高山或建築物遮擋. 真厲害..... 真大膽了. 

 其實我反而覺得, 睇下靚靚姐姐在風中有點靚, 比追風更過癮呢!

 

 










 

噔....噔....噔....噔.... 整屋頂

上個星期一發現出租物業屋頂有事, 就立刻打電話找人來修, 點知臨入冬天, 人人都裝新屋頂, D友仔個個都鬼咁忙, 有人仲話要11月才來到幫我修.

終於找到人來, 真係好貴囉, 貴的原因, 因為我屋頂好高, 要把44呎的梯, 普通D人做唔到, 之後, 有2個來到, 都走左, 話佢地做唔到.

只是44呎的梯比普通梯用料要厚D, 而44呎梯比22呎梯就唔只重1倍, 可能講緊1.5倍, 應該大約有一個人咁重左右.

只是一申開把梯, 把梯的重心就會向上移, 所以要最少2個大隻佬才攪得掂佢.

見到D友仔爬上去, 真係好似睇空中飛人的感覺.

D友仔上去後, 拍到破了的防水面和復修後的防水面....

口釘頂起左防水面, 揼番佢, 再加膠水. 

D管補番D膠來防水. 

不過, 發現了之前上次原廠公司來修時十分馬虎, 竟然...... 留下一小個缺口, 露出下邊的木, 如果再唔修, 數年後就有大問題了, 所以, 都係時時找不同公司來修下, 錢都係唔好慳.

 











聽班友仔講, 我屋頂仲好好, 應該還有廿年玩, 希望成佢貴言, 因為換新屋頂, 真係好貴囉. 

國內月餅生意, 不用生產月餅

聽說香港人一年丟左唔知幾多千萬個月餅喎, 咁就唔係好好了, 好浪費嘛.....

不過, 國內的做法又好似有點..... 我都唔知道點講好.

話說呢, 國內月餅店出月餅券, 如果面值係100元, 佢地$65賣俾分鎖商, 分銷商用$80賣俾消費者A, 消費者A再送給消費者B, 消費者B, 再用$40賣俾黃牛黨, 黃牛黨最後以$50賣回給月餅店.

在這個情況下, 月餅店連爐都唔洗開, 料都唔洗用, 就乾賺$15, 分銷商又係賺左$15, 消費者B有$40落袋, 而黃牛黨都有$10執.....

噢.....乜咁樣呢, 將中國人的送禮傳統, 來個證券化, 由實體經濟, 變成虛擬經濟, 中間少了浪費之餘, 又可以造就中介行產的生存空間. 
 
不過呢, 這個真係無危機, $100的月餅券, 雖然無$30-40料都唔得, 就算全部人把月餅券拿回兌換月餅, 月餅店仍會有$10-20賺, 隨笨有精. 

我這裡的朋友?

哈, 幾天前, BLOG上有人問我, 我在加記這裡的朋友, 為何無上來我這BLOG?

為何我這裡的BLOG友, 沒有像在現實生活中熟識我呢?

其 實, 我用港人的想法來寫BLOG, 好多我這裡的朋友都未必有興趣, 而且佢地又唔一定中文好好, 更不會識打中文字. 就算來看我寫D乜, 都未必可以留到回應, 又或俾大家見到佢地上來睇我個BLOG. 佢地睇到好過癮時, 頂多打個電話來同我吹水, 或約我出去食飯吹水囉.

要明白一點, D人好似我咁, 就算原本係香港出生長大, 生活左好耐, 但一移民左來加國, 心態都唔同左, 又未必同大家傾得埋.

我係用左好大努力, 才同大家傾到計咋.

香港打風嗎?

仲話係今年全球最強風暴的天兔, 仲話會打到珠江口, 睇佢幅圖, 會係惠東略過香港, 再係南沙到珠海登陸入內陸. 各位在港澳的網友們, 大家要做好防風預備, 掛高風球時, 就不要再出街了, 還要預備一些後備物品如乾糧和防水膠紙係身邊, 如果可以檢查下門窗, 用膠紙加固玻璃窗和門.  

還有, 我會懇切地為各位祈禱, 願神保護你們一切安好.

我自己這裡今天都會落雨, 修屋頂公司剛剛打來, 話今天會來到幫我修好佢, 希望佢地真係會來啦.

 

 

四季豆與荳苗

咪以為係香港或中國種出來, 是係加記魁北克種出來的.

只是5月開始種, 7月就要收哂, 如果唔係, 好老好硬.

六月時, D芽好嫩, 有豆苗食, 好好食.

七月初, 無嫩芽了, 全長花, 白紫小花, 十分好看. 

到七月中, 就有四季荳食. 

加國制度的失誤

前幾天, 因為部車還有保養, 就拿車去賣車的大品牌車行, 作例行檢查, 職員竟然話, 我後輪剎車片, 因為個掣動CAKE住, 把剎車片磨得很薄, 需要全套剎車系統更換, 要收我$460.

我開車咁留意架車, 實在感覺唔到剎車片有阻力, 就同職員講, 過多2個月才回來更換.

第二天, 我就拿部車去我別一間街坊車房, 找佢地來看看剎車系統有D乜問題.

點知查到無事, 清理和服務個剎車系統, 都只是$40元多一點點.

即係車行有心來呃客宰客囉......

真係問題接踵而來, 出租物業屋頂的防水層, 被強風吹壞了. 只是這屋頂防水層只是5年新, 還有 SEARS 用大公司信用擔保的保用嘛, 打電話去公司叫派人來修, 點知連打4日, 每天打4-5次, 都無人聽, 原本還有法文留言功能(理應係雙語), 但我E貓去投訴無人回覆我後, 連個法文留言功能都無埋.

即係話, 係連大公司都唔好信佢, 信佢一成雙目真係會失明, 唯有自己再出錢, 請其他公司來同我修好佢.

今 年可能我有阻滯, 屋企的木玻璃窗裡的舊防熱玻雙層璃舊了, 找間係我地左近, 開業27年的玻璃舖換, 點知換左後, 仲差過舊玻璃. 以前舊玻璃要外邊到零度才會凝結水氣了, 但係現在新裝上玻璃, 外邊10度就凝結水氣了, 我俾D相其他人看, 個個都話好過份.

中秋快樂

加國過中秋好悶的原因, 因為唔係假期, 約唔到朋友出來...... 一個忙字囉.....

而且, 我這裡香港移民走得七七八八, 其他中國人過中秋, 都因為風俗不同, 大家都各異.

怎樣也好, 祝在香港的大家呢, 中秋快樂, 開開心心咁啦......

應對老年病, 由後生做起

很多中國人以為, 中國人瘦, 就沒無西人咁多高血壓, 膽固醇, 心臟病和糖尿病, 誰知, 中國人糖尿病發率已經超過美國.

中國城市人患糖尿高於農村人, 隨著經濟發展，中國的成人糖尿病率不斷增長. 上世紀80年代，中國的糖尿病患病率不到1%；2000年左右，患病率為5.5%; 2007年，患病率就到為9.7%, 今年更超過美國, 11.6%.

這個十分驚人, 因為即是代表很多中國人年老時, 醫療開支會十分高昂, 只是很多中國人還未意識他們將來老年生活會有幾艱難.

我 KEEP自己身體一直都好好, 今天才量過血壓: 120和77, 心跳70. 只是我天生瓜子口面, 咀細, 上下鄂就一定細, 唔夠位生D牙出來, 就會頂住D牙, 就會變兔牙. 但係人到中年, 牙患就開始出來, 每年都花唔少錢也不提了, 每天今更要花很多時間來溂牙清理口腔.

有時覺得, 網上D人同人嗌餐死, 係好無謂, 身在福中不知福, 先天體質比我好, 都唔知好好珍惜. 網上D人三九唔識七, 唔係由得人地喜歡講乜囉.

我曾經俾人係現實生活上中傷, 因為人人都知道有我這個人存在, 但唔多深入認識我本人囉, 就十分容易中傷我.

只是我都無理到這些人, 做好自己本份. 到了今天, 大部份這些人, 都無我咁好境, 身體健康也沒有我咁好, 因為這些人年青時, 花埋哂D時間係D唔等洗的是非閒話之中, 沒有做好自己本份, 理好自己身體, 人到中年, 經濟吃緊, 身體就開始走下坡.

有些人到這時醒覺都還好, 有些人更變本加厲, 更加去涉入是是非非之中, 更唔關注下自己的年老和健康問題, 實在與人無尤了, 神仙都幫唔到佢地.

大家係香港, 就算香港政府將來變成比加拿大政府更福利主義, 一切的社會福利, 都只係杯水車薪. 唯一救到佢地自己的人, 不是香港政府, 而係佢地自己.

苦命女 - 千紅一哭 萬艷同哀

噢.... 其實我係男人, 對近期女星離婚案呢, 有個迷思.... 

為何一個如此明確主動追求愛情的女性, 會落得數度男女關係失落.....?

現在講緊女方出資出力去幫男方上位, 而女方又係很多男性心中的女神喎.

算了吧, 我又唔係局內人, 當然唔會胡亂猜測其中原因, 怎樣也好, 祝願當事人一切安好.

PS: 只是呢, 哈哈哈, 我這個八掛公實在忍唔住, 都要爆幾句嚮口出來....

很多女性, 視女星為競爭對手, 事業上唔夠來, 就同人爭男人囉....

唔知道這個係我一廂情願, 還是真實係咁.....?

其實, 這些女性都傻傻地, 女星幫個男人上位, 個男人身上一切的成就榮譽, 都係同個女星有關, 咁樣爭回來的男人, 會馨香嗎? 這樣的男人拖著這些女人, 在街上行, 可以抬得起頭做人嗎? 連女星都留不住個男人, 何況這些係事業上唔夠班的女人?

男人面對一個對自己有恩的女人, 都可以捨之而去, 在外邊有小三小四小五小六, 其他食佢住佢著佢的女人, 佢又會怎樣面對呢?



說幾句這些男人的壞話, 提醒各位女網友, 不要再想著"男人不壞, 女人不愛!" 一次又一次證明到, 這些人靠得住, 豬乸都會上樹呀!

破碎的加國夢

昨天再去唐人街間圖書館, 發現又係關了門, 在門口吃閉門羮的義工小妹妹(同上次的不是同一一個), 又係認得我, 來同我講話. 佢話, 聽說管理的"X老師"離開了, 只有一兩個義工知道圖書館不會再開, 他來到後, 打電話給朋友, 才聽到這個傳聞.

見到眼前個小妹妹, 就想起佢口中的X老師, 可能十年前吧, 圖書館和大樓開始運作時, 這X老師就在那時獲聘為管理員, 聽朋友說, 他有法國MBA沙紙, 只是移民來加國後, 就來這裡工作.

當時X老師, 比現在這小妹妹大, 但比我還少. 只是這些政府資助項目人工低不在講, 仲好似做到打雜咁, 可能10年過後, 這X老師厭煩這種沒有前途的工作, 又或者政府見舉辦團體都唔係做野, 就減資助, 連帶X老師都受影響.

我想, 這個可能係一個破碎的加國夢了, 現在回國內去發展.....

見到眼前的小妹妹, 想起佢用"老師"來稱呼一個比我年紀少的人, 我心想佢一定好細, 講講下, 佢竟然稱呼一個讀緊大學的男義工做"師兄", 我才發現佢連大學都未入, 讀緊預科. 咁..... 我才醒起自己輩份都好高咁喎, 佢可能可以叫我做"師祖"

見小妹妹咁好人, 同我講咁多野, 本來想請佢去食個午飯. 但當時我一想到佢做得我個女有突時, 就想起人家用伯父或金魚佬來形容..... 噢, 都係君子不立危牆之下, 快快走人了.

PS: 後來我巡視座大樓, 唉, 真係管理得唔係好好囉, 使用量又偏低, 真係驚有天, 政府把這座唐人街的公眾大樓, 由唐人手中收回去.

前排講我這裡的福音機構, 搬左入去這大樓, 只是只佔地庫的一小角, 2-3張辦公枱, 幾個書架. 除了這福音機構, 現在連圖書館都摺埋, 就真係沒有任何人使用了. 見到場面咁泠清, 難怪很多中國人來了又走了, 可能走時, 不多不少有個破碎的加國夢吧!

兩性之間

成日都聽國內同一故仔, 話說有年青夫婦結婚後幾年, 都未有小朋友, 原來佢地以為男女睏埋一齊過夜, 就會自然有小朋友.

噢..... 其實..... 我覺得呢..... 這個無乜可能囉, 點會咁咖..... 咁.... 其實, 如果...... 好自然嘛, 男女一睏係度, 仲係已經結左婚, 一定會黐埋嘛, 黐多幾黐, 就會見到男女有乜唔同嘛..... 再用下D想像力, 再唔係上網查查"兩性之間", 一定找到好多答案..... 我係教徒都唔會咁戇居嘛, 就算我未結婚, 拍拖俾人阻頭阻勢, 我都知道結婚前, 有D乜野係唔可以蹉錯界!

黐線咖, 夫婦一齊睏係度幾年..... 都未知道男女有乜唔同..... ?

一 係這些人守身如玉, 一係男的似老夫子女的似鐘無艷, 一係係商家的嘜頭囉, 竟然國內有人攪個"性生活培訓班", 2天課程, 收2千5人仔, 嘩, 我JJ先生真係O哂咀呢, 乜國內人D錢咁易賺? 國內D人真係咁大富貴嗎? 佢地唔通無地方洗錢, 自己上網查查唔係知囉.

PS: 不過, 話時話呢嗄...... 我係網上找第一張相時, 搵左好耐, 想搵幅有東方男女睏係床上的相, 點知, 搵來搵去都搵唔到呀...... 即係呢..... 東方人唔喜歡提起男女係床上的片段, 或做毛豆.

其 實我覺得, 遮遮掩掩兩性之事, 係唔好囉. D人白痴才會容易做錯事, 當知道一切後, 就可以自行決定有D乜野唔好做囉. 很多教會在這些事情上, 點嚴點高水準, 都有人奉子成婚, 這些人大多婚後窮途潦倒, 因為越唔俾佢地知道兩性間的真相和責任, 一錯係上來, 越是錯得離譜.

如果這個係謊話, 將會係最難推翻的謊話

哈哈哈, 大家又來聽我發瘋講"假如".....

前幾天科學家講話呢, 1977年射上太空的VOYAGER 1宇宙探測船, 已經係上年8月左右呢, 飛離我地這個太陽系喎.... 佢地憑乜咁講? 就係靠艏宇宙探測船上的探測儀, 靠乜乜粒子的數量來推算囉.

我心想, 探測船上的位置儀一早壞左, 現在單靠乜乜粒子的數量來斷斷估無痛苦, 我覺得就..... 有無可能又係壞左呢?

不過為何咁難推翻班科學家的斷估呢? 因為要再射過一艏宇宙探測船上去, 才可以證實佢地錯. 只是VOYAGER 1射的那年, 剛好趕上太陽系九子連珠, 九大行星成一直線, 就係靠這9大行星一字排開的引力, 將VOYAGER 1高速撥了出去. 這樣一撥, 個速度當然係比人類任何推動火箭速度更快. 不過, 話時話啦, 就算係破紀錄咁高速, 都要飛左36年, 才出到太陽系, 現在仲係靠乜乜粒子數量來斷斷估. 

只是下次再有九子連珠呢, 係要到公元2153年才有, 到時才可以再靠9大行星的引力, 撥過別外一艏宇宙探測船出太陽系, 到時才證明到今天的科學家有無錯或講大話呢.....

請帶我到遠方去....

這是一個國內年青女導遊地陪對我說的.....

那次我在香港一個人參加國內團, 只是同團一些其他男團友, 攪到個男導遊要半夜跑去公安局, 為他們解圍.

可能個男導遊見我人不錯又老實, 連一般男人夜裡的壞消遣也沒有, 就同個女地陪講開我.

只是, 女地陪這句說話, 來得沉重了一點, 令我感到責任很大, 好似風塵三俠裡, 紅弗女半夜偷走出相府, 來到李靖的旅店, 要求跟住李靖.

尤其, 佢誤以為我係港燦, 實際係加燦, 帶佢回來我這裡 - 法語的加國魁北克, 佢又真係會好大鑊咖. 我唔住近任何唐人街, 而且離唐人街更是很遠, 這裡對佢來講, 一定係"叫天不應, 叫地不聞"的窮山惡水. 如果國內生活令佢煩惱, 可能我這裡卻令佢悶壞了.

有時, 男女關係呢, 唔係我係個好人, 無不良嗜好, 就一定掂喎, 總要大家思想和生活習慣相近, 才有得發展男女關係咖.

真係唔好傻呀, 不要以為外國歸僑/港澳同胞, 就一定會帶俾佢一個好的新開始, 相反地, 更可能帶埋佢無止境的新煩惱. 佢人生重新起步, 連語言和生活習慣也要好似小朋友咁, 從新學過, 係十分煩惱的.

有時, 很多外國歸僑的原居地, 可能比國內的二線城市還要落後, 任何女性一定要睇清楚是那裡的外國歸僑, 人家就算係什麼什麼老總老闆, 都可能只是個虛函或小公司規模, 最後看清楚時, 就不能怪人家有心欺騙. 

 PS: 很多港燦北上娶妻, 聽過唔少新移民婦女指責港燦"唔對板", 其實, 這個又唔只發生係香港, 有時連香港遠嫁他方的港女, 都會有如此感覺, 只是如果港女嫁個西人, 因為文化唔同, 佢地一時三刻仍未感到"唔對板", 但耐左, 就會看到西人缺點的一面.

其實, 任何人都有缺點, 視乎男女雙女夾唔夾, 可否容忍到對方缺點. 只是大家一埋堆見面, 就要我跳過哂認識和拍拖這些重要步驟, 立刻做個咁重大的人生決定, 如果我同佢講YES, 佢都會心裡質疑我有幾多誠意啦.

我只是來看書!

我這裡唐人街有2間中文圖書館, 我比較喜歡去其中一間, 不是因為那間D義工多後生小妹妹, 另一間D義工全係阿嬸. 而是因為其中一間D書新D, 多D旅遊風景畫冊囉.

已經很多年沒有去這2間圖書館借書了, 最近我喜歡去圖書館借D風景畫冊回來, 用數碼相機拍下. 因為自己去旅遊時, 真係要好好彩才會影到好似畫冊裡D相咁靚囉.

只是我多年沒有借書, 會員年藉早已中斷了, 要重新再付年費, 只是, 找來找去, 都找不到負責人, 只見到一些年青義工.

可 能因為前排有幾宗針對中國留學生的罪案(包括碎屍案), 有些青年義工都變得驚弓之鳥, 我變成要不斷解釋, 我只是來付年費, 另無其他歪念, 也使我想起我以前間教會的青年團契. 圖書館裡一些男義工對我的奇怪態度, 雖然說不上令我不舒服, 但我真係好想同佢地講: "我入來是看書借書, 不是為到溝女呀! "

今天我去到時, 這圖書館連門都無開, 得個小妹妹義工係門口食閉門羮, 可能這小妹妹年紀較少, 自我保護意識不足. 我去到佢就走來問我這個那個, 當我好似係負責人咁, 仲問我攞手機來打俾負責人. 我終於可以開口表明我的來意 - 我只是來看書借書, 沒有其他目的. 

其實, 這圖書館裡咁多好書, 真係唔希望間圖書館摺埋囉, 不過, 我睇到佢地有超多的人事矛盾, 而且管理得好混亂囉, D書亂到有如雜書灘咁.

別一間阿嬸們做義工的, 又真係做得好好囉, 我唔記得左個會員號碼, 佢同我查番出來, 又話叫我多D去借書, 而且D書放係架上, 放得好有系統好整齊囉. 唔似別一間, 放書放到好似雜書灘咁.

PS: 上年夏天, 見番以前那間教會裡一個麻煩男團友(可以同我這裡個奇怪人有得比), 佢都40幾歲人了, 頭頂都變地中海啦, D頭髮又蓬鬆又長. 我諗, 佢一定仲係跟住佢個教授, 仲撈緊份發霉的助教. 只是佢都唔化.....仲著到成個學生王子咁款, 一睇佢個樣, 就估到佢又係約左佢D女學生. 佢有好多女學生崇拜佢咖, 不過, 個個女學生都只係崇拜佢幾年, 就同佢講拜拜. 這種人後生時, 唔做好自己本份, 人一步入中年後, 卻來徒傷悲, 可憐呀.

有些人好似這個麻煩男團友咁, 唔知道係咪喜歡幫人湊女? 還是喜歡D後生女腦筍未生埋? 我一見到圖書館年青義工, 一定會避之則吉, 這些人唔識點去成熟交友, 就好似我BLOG上那奇怪人咁, 講到D男女關係咁恐怖咁差咁卑劣, 唉..... 

單身稅?

哈哈哈, 最近聽泰國政府要徵收單身稅, 事因為泰國未來將會面對人口老化及勞動力緊縮的問題，有專家竟建議向未婚人士徵收「單身稅」.

原來泰國人口年齡分佈不平衡，不單出生率低，連結婚率都低, 老化嚴重, 預計2023年泰國60歲或以上人口將佔總數20%，真係好大鑊, 看看日本就知道有幾大鑊.

其實這個係治標不治本囉, 大家可能唔留意, 泰國男女比率嚴失衡, 以前係1:3, 現在好少少, 但都係2:1囉. 不過, 唔係好似香港輸入性的男女失衡, 而是水土令到性別失衡.

 以前泰國男人可以娶四個老婆, 不是因為當時男人花心, 而是以前農業社會, 單身女性的命運會十分悽慘, 一定要有個有力耕田的男人來依靠. 查實, 俾我揀, 我真係唔會咁笨, 娶咁多個女人係身邊, 就算我有錢養起哂, 煩都煩死我.

 只是近年當地社會進步, 女性可以有自己的謀生能力, 就不再需要一夫多妻來照顧單身女性, 只是持續的低結婚率, 當然就會變成低生育, 久而久之就一定係人口老化. 

以前, 泰國社會條件差, 當地男人出家當和尚成風, 因為有政府養, 令到適婚男女更失衡. 但不要以為社會進步, 適婚男女失衡會改善, 現在當地社會環境更自由和寬鬆, 卻造就了"人妖"這一特殊群體迅速擴大. 而受這種社會氛圍影響，泰國男性也普遍有偏女性化和陰柔化的趨勢.

 除了人妖, 泰國男性用情不尊, 更嚇怕當地女性, 許多泰國女性在談到自己遲遲不結婚的原因時, 都會不無諷刺地說，泰國男人分為兩種，或女性化或不專一.

其實, 世界各地很多女性跟香港女性都係好相似咖,  事業/生活/社交等各方面, 越來越獨立和自信, 享受獨身的自由(就好像我JJ先生咁). 但擔心婚後, 被配偶束縛, 又或被家務所牽絆, 擔心無法處理跟配偶父母關係, 擔心婚后變得醜樣(淨係女人嗎? 講笑咩, 你估男人唔怕咖?哈哈哈...... )

PS: 其實各位女網友呢, 不單只女性婚後把自己的命運交給男性主宰, 其實男性也把命運交給女性呢, 只是把自己命運交給一個不適合的人, 又真係會影響自己的人生呢.....